Aksara Sunda téh salah sahiji warisan kabeungharan budaya Sunda anu geus aya ti mangsa bihari. Nyatana kapanggih dina prasasti jeung naskah-naskah buhun. Para ahli geus ngupayakeun sangkan aksara Sunda téh bisa dipaké deui dina kahirupan sapopoé kiwari. Sangkan bisa leuwih luyu larapna kana kaayaan basa Sunda kiwari, wangun jeung tata tulis aksara Sunda téh dibasajankeun. Sanggeus dibakukeun taun 1997 jeung 2008, kiwari aksara Sunda ogé diajarkeun di sakola.
Ieu buku disusun minangka pangdeudeul pangajaran aksara Sunda dina raraga ngawanohkeun di tingkat sakola dasar. Eusina medar wangun-wangun dasar aksara, cara nulis, cara maca, nyusun aksara sarta dilengkepan ku latihan-latihan. Unggal jilidna ngawengku matéri anu diluyukeun jeung kamekaran kamampuh murid, sangkan percéka diajar nulis jeung maca aksara Sunda.
